ನಕಲಿ ಕೋವಿಡ್ ಟೆಸ್ಟ್ ವರದಿ, ಪಾಸ್ ಪೋರ್ಟ್ ತಯಾರಿಸುತ್ತಿದ್ದ ಆರೋಪಿ ಬಂಧನ! | ಜನತಾ ನ್ಯೂಸ್

ಬೆಂಗಳೂರು : ಕೋವಿಡ್-19 ಪರೀಕ್ಷೆಯ ನಕಲಿ ವರದಿ ಹಾಗೂ‌ ನಕಲಿ ಪಾಸ್ ಪೋರ್ಟ್ ತಯಾರಿಸಿ‌ ಕೊಡುತ್ತಿದ್ದ ಆರೋಪಿಯೊಬ್ಬನನ್ನು ಹುಳಿಮಾವು ಪೊಲೀಸರು ಬಂಧಿಸಿ, ಆರೋಪಿಯಿಂದ ಲ್ಯಾಪ್‌ಟಾಪ್, ಮುದ್ರಣ ಯಂತ್ರ ಹಾಗೂ ನಕಲಿ ವರದಿಗಳನ್ನು ಜಪ್ತಿ ಮಾಡಿದ್ದಾರೆ.

ಕೇರಳದ ತ್ರಿಶೂರ್ ಜಿಲ್ಲೆಯ ನಿವಾಸಿ ನಿಪುಣ್(30) ಬಂಧಿತ ಆರೋಪಿ. ಕೆಲ ವರ್ಷಗಳ ಹಿಂದೆ ನಗರಕ್ಕೆ ಬಂದಿದ್ದ. ಕಾಲೇಜುಗಳಲ್ಲಿ ವಿದ್ಯಾರ್ಥಿಗಳಿಗೆ ಸೀಟು‌ ಕೊಡಿಸುವ ಮಧ್ಯವರ್ತಿ ಕೆಲಸ ಮಾಡುತ್ತಿದ್ದ. ಲಾಕ್‌ಡೌ‌ನ್‌ನಲ್ಲಿ ಕೆಲಸವಿರಲಿಲ್ಲ. ಅವಾಗಲೇ ನಕಲಿ ವರದಿ ಹಾಗೂ ನಕಲಿ ವೀಸಾ ತಯಾರಿಸಿ ಮಾರಲಾರಂಭಿಸಿದ್ದ ಎನ್ನಲಾಗಿದೆ.

ಗ್ರಾಹಕರನ್ನು ಫೇಸ್‌ಬುಕ್ ಮೂಲಕ ಸಂಪರ್ಕಿಸುತ್ತಿದ್ದ ಆರೋಪಿ, ವಾಟ್ಸ್‌ಆಯಪ್ ಮೂಲಕ ಮಾಹಿತಿ ಪಡೆದು ಕೋವಿಡ್ ಟೆಸ್ಟ್ ವರದಿ ತಯಾರಿಸುತ್ತಿದ್ದ. ಆನ್‌ಲೈನ್ ಮೂಲಕ ಹಣ ಪಡೆದು ವರದಿಯನ್ನು ಗ್ರಾಹಕರ‌ ಕೈಗೆ ತಲುಪಿಸುತ್ತಿದ್ದ. ಕೋವಿಡ್ ನಕಲಿ ವರದಿಗೆ ರೂ.2,000ದಿಂದ ರೂ.5,000 ಪಡೆಯುತ್ತಿದ್ದ. ನಕಲಿ ಪಾಸ್ ಪೋರ್ಟ್ ಗೆ ರೂ. 25 ಸಾವಿರದಿಂದ 5 ಲಕ್ಷ ರೂ.ವರೆಗೂ ಪಡೆಯುತ್ತಿದ್ದ ಎನ್ನಲಾಗಿದೆ.